یارەێل یارسانی دانیشتگ له وڵاته‌یل ئروپائی!
وەئاگاداری گشت لاێکتان رەسنیم کە کۆمیتەێ هەڵوژێریاگ ” کومه‌ڵگاێ باوه‌ڕی یارسان- ئروپا” له ڕێکه‌فت٠٥-٠٢-٢٠١٧ و لە ئەنجام چەندین کۆبونەوە ئەڕا جێوەجیکردن کار و چالاکیەکانێ، رەسیە ئی ئاکامە کە یارسانیەکان لە شیوەێ کار و چالاکیەکانێ ئاگاداروە بکەێ. وەتەفرەنجداین لەوەێ کە کۆنفرانس گشتی کە لە ڕێکەفت ١٤-٠١-٢٠١٧ لە ئوستۆکهۆڵم پاتەخت وڵات سوئد کۆمەڵێک ئەرک دیارکیکریاگ ئەڕا جێوەجێکردن خستیوە سەرشان کۆمیتەێ هەڵوژێریاگ، لەی پەیوەندیە کۆمیتە وە ئەرک خوەێ زانی کە یارسانیەکان دانیشتگ لە وڵاتەیل ئوروپایی لە گشت پەسەنکریاگەکان و شیوەێ داڕشانن کار و ئەرکەکانێ ئاگادارتان بکەێتوە.
– ئەرکەکان ئەندامەیل کۆمیتە وە شێوه‌ێ مه‌شوه‌ره‌تی و له سه‌ر بنه‌مائ رێکەفتن گشتی، دیاری کریانە کە لە دمایی ئی ئاگادارییە کەفێتە وەرچەوتان.
– ڕه‌فتارنامه‌ێ ئه‌نجومه‌ن کە پێشتر نویسیاوی و کۆنفرانس گشتی ئوستۆکهۆڵم وە تەفرەنج و تێبینیوە پەسەنێ کردیو، دوارە خوەندنەوە ئەڕای کریا و پەسەن کریا، کە وەشیوەێ جیاواز بڵاو کریەتوە.
– لۆگۆ یان ئارم ئەنجۆمەن کە کۆنفرانس گشتی ئوستۆکهۆڵم تەفرەنج و تێبینی لەسەرێ داشت، دوارە لە نۆ داڕشیاوە و پەسەن کریا کە لە دمایی ئی ئاگادارییە کەفێتە وەرچەوتان.
– هەر لەوجۆرە کە لە پەسەنکریاگەکان کۆنفرانس گشێی ئوستۆکهۆڵم ئاماژە وەپێیان دریاوی و پەسەنکریاوی” کۆمه‌ڵگاێ باوه‌ڕی یارسان – ئروپا” جور رێکخراوێک مەدەنی- فەرهەنگی، درێژه ده‌ێته هەوڵه‌کانێ ئەڕا ناسانن کۆمەڵگاێ یارسان و باوەڕ یاری، وەپارلمان ئوروپا، رێکخراو “ماف مرۆڤ”، نەتەوە یەکگردگەکان و کۆمەڵگاێ ئازاد دونیا.
لە دماییە،کۆمیتەێ هەڵوژێریاگ دەس هاوکاری و پشتیوانی درێژ کەێت ئەڕا گشت تاکەکان کورد و یارسانی دانیشتگ له وڵاته‌یل ئروپائی و ئومێدەوارە کە هاوڵاتیەلمان وەهەر جیاوازی فەرهەنگی، ئایینی و ئایدولۆژیکوە کە دێرن، یار و پشتیوانمان بوون.
وەگەرد رێزمان
کۆمیتەێ کومه‌ڵگاێ باوه‌ڕی یارسان – ئروپا.
۱۱ـ۰۲ـ۲۰۱۷
پەیڕەونامە
ئەنجومن” کومەڵگای باوەڕی یارسان ـ ئوروپا”
ئەنجومەنێ “کومەڵگای باوەڕی یارسان ـ ئوروپا” ئەنجومەنێکە کە خوازیار پەێوەندایین ئختیاری تاک و گوروەکان ناو کومەڵگای یارسان نیشتەجێ ئروپاس.
ئی ئەنجومەنە تواێد کە لە ڕێ چالاکیەل فەرهەنگی، ئایینی، وەیکوەنیشتن و گوفتوگو دین یاری و هەر ئیجورە کومەڵگای یارسان زیاتر لە پیش وە کومەڵگای جەهانی بناسنێد.
كار سەرەکی ئی ئەنجومەنە تەڵاش خەێرخوازانەێکە ئەڕا وە ڕەسمیەتناساندن”دین یاری” لە ڕێکخریاگ نەتەوە یەکگردگەکان و کوموڵگاگەل ئوروپایه ، و وە هویچ شیوەێک خوەێ ناخێتە ناو چالاکیگەل سیاسی و بازرگانی.
ئی ئەنجومەنە وە ڕەوشگەل دموکراتیک بریەتە ڕیوە و ئەندامەکانێ خاون ئەرزشگەل بەرابەرن. جیاوازی فکری، جنسیەتی، چینایەتی، و گوزەشتەی سیاسی و کۆمەڵایەتی نەقشێک لە وەڕیوەبردن کار و ئختیار ئەندامەکان نەیرێد.
ئەنجومەن کومەڵگای باوەڕی یارسان ـ ئوروپا کوشش کەێد تا بابەتگەل یارسانی بکرینە جێ پرس و ڕاوێژ تا وە ئیجورە دەنگ ئازار و کەمکەسریەکانیان برەسنێتە گوش کومەڵگای جەهانی و دەسلاتدارگەل ئوروپایی.
ئی ئەنجومەنە هەڵساس تا لە رێگای چاڵاکیگەل مەدەنی و فەرهەنگی ئەڕا پێشبرد ئازادی و دموکراسی لە کومەڵگای یارسان تەڵاش بکەید. بەنا وە ئی باوەرە خوازیار هاوکاریکردن وە گەرد ئەو ڕێکخریاگەلەسە کە لە سەر بابتگەل حقوق بەشری کار کەن.
- ۱ ناو ئەنجومەن
ئەنجومەن” کومەڵگای باوەڕی یارسان ـ ئوروپا ”
- ۲ نیشانی نەنجومەن
نێشانی ئەنجومەن، نیشانی سۆخەنگو ئەنجومەنەکەس.
- ۳ ناسنامه‌ێ ئەنجومەن
ئەنجومەن کومەڵگای باوری یارسان – ئوروپا، ڕێکخریاگێکە سەرەوخوەی و دموکراتیک کە وارد چالاکیگەل سیاسی و بازرگانی ناود.
- ٤ ئامانج ئەنجومەن
ـ وه ڕه‌سمیه‌ت ناسانده‌ن دین یاری و ناسنامه‌ێ یارسانیه‌کان، له لایان ڕێكخریاگ نەتەوە یەکگردگەکان(سازمان ملل) و کوموڵگاگەل ئوروپایی.
ـ بەهرەگردن لە شیوازگەل زانستی و ئیمروژی و هەرئیجورە حوقوق ئنسانی شیوەکریاگ له جاڕنامه‌ێ حقوق به‌شه‌ر ڕێكخریاگ نەتەوە یەکگردگەکان ، ئه‌ڕا ناسانده‌ن جەهانبینی و چوارچو ئەرزشی و ئخلاقی دین یاری.
ـ پارێزان دەستکەفتە کوموڵایەتیە وەنرخەکان.
ـ هه‌وڵدان ئه‌ڕا ڕه‌سین وه به‌رابه‌ری جنسیه‌تی له کومه‌ڵگاێ یارسان.
- ٥ کار و کوشش ئەنجومەن
ئەنجومەن تەڵاش کەید تا وە ئی کردارگەلە وە ئامانجەکان خوەی برەسید:
ـ وەکیلی کردن کومەڵگای باوری یارسان – ئوروپا لە” ڕێكخریاگ نەتەوە یەکگردگەکان”(سازمان ملل)
ـ سازکردن چاڵاگیگەل کولتوری ئەرا ئەندامەکان ئەنجومەن.
ـ وەریوەبردن دیاردە خودمالی و فەرهنگیەکان یارسان جور ” جەشن خاونکار”.
ـ دایین زانست دینی وە یارسانیگەل وەروی دەفتەرگەل دینی یارسان.
ـ تەڵاش ئەرا سازدایین و بتەوکردن پیوەندگەل دوستانە لە بین ئەندامگەل کومەڵگای یارسان ئوروپا.
ـ پشتگیری جوانەکان لە کردەوەگەل زانستی و پروەردەیی و هەر ئیجورە کار پیداکردن.
ـ دایین زانست لە سەر مادە هوشبەرەکان و هاندانێان ئەڕا دویریکردن لە توندوتیژی.
ـ دایین زانست و تاکە یارسانییەکان نیشتەجێ ئوروپا له سه‌ر ئەرک و مافێان لە کومەڵگا.
ـ وەڕێخستن دیدار و ڕاویژ لە لە فەزای حەقیقی و دیجیتالی ئەڕا زیادکردن هوشیاری و زانست ئەندامەکان لە سەر ناسنامه‌ێ یارسانیه‌کان و دین یاری.
- ۶ بنچینەی ئەخلاقی ئەنجومەن
ـ چالاکیەکان ئەنجومەن وە شیوەی دموکراتیک و گونجیاگ وەگەرد یاسای کشوەرگەل ئروپاییا ئەنجام گرێد.
ـ داشتن پەیوەنیگەل دوستانە، شایستەزانی دولایانە، ڕێاباری و دویری لە توندوتیژی بنچینەگەل ئخلاقی ئەنجومەنەکەن.
ـ وە پای ئەرزشگەل دموکراتیک و جاڕنامەی ” سازمان حوقوق بەشەر”، ئەندامەکان ئی ئەنجومونە خاون حوقوق بەرابەرن
- ٧ مەرجگەل وەئەندام بیین
ـ هەر یارسانی ١٦ساڵە و بانتر، توانێد وە هەناردن خوازیارنامە بوتە ئەندام ئەجومەنەکە.
ـ ئەندامەکان بایەد پابەند بنچینەگەل کاری و ئەخڵاقی ئەنجومەن بون
ـ ئەندامەکان بایەد وە روی توانایی خوەێان ئەرا پێشبرد کارەکان ئەنجومەن بکوشن
ـ ئەندامەان ئازادن کە بونە ئەندام ڕێکخریاگەلکتر وە مەرجێک گرفت بنچینەیی ئەڕا ئەنجومەنکە سازنەوت.
ـ ئەندامگەلێک کە بنچینە ئخلاقی و کاری ئەنجومەن ژێرپا بکەن وە ڕوی پەیرەونامە ئەنجومەن وەگەردێانا هەڵسوکەفت کریەت.
ـ ئەوکەسانە کە وە هەڵسوکەفت خوەێان ئەنجومونەکە زیانبار بکەن، لە ئەندامیەتی ئەنجومەن جواو کریەن. برێارەکان شەورای ڕەهبەری بایەد دموکراتیک و وە ڕوی بەرگە بود.
ـ شەورای گشتی توانێت بڕیارەکان شورای ڕەهبەری بگورنێت یا بنێتەلا.
ـ ئەندامەکان توانن وە هەناردن خوازیارنامە ئەڕا شەورای ڕەهبەری واز لە ئەندامیەتی ئەنجومەن بارن.
- ٨ شەورای گشتی
ـ شەورای گشتی بانترین ئورگان بڕیاردەر لە ئەنجومەنە.
ـ شورای گشتی ساڵێ یەکجار لە وەزر تاوسان کوبوتوە. شەورای ڕەهبەری وەخت و شون کوبینەکە دیاری کەێد.
ـ کوبیین شەورای گشتی وە بەشداری ٤/٣ شەورای ڕەهبەری ڕەسمیەت پێدا کەێت. ئەگەر ئی بەشە یەکوە نەگرێد، کوبیینەکە کەفێدە دویا.
ـ جارنامە ئەڕا بەشداری لە کوبیین شەورای گشتی لە ڕیگاێ شەورای ڕێبەری ئەڕا ئەندامەکان هەنریەت.
- ۹ کارکرد شەورای گشتی
ـ بڕیاردەرە ئەرا ئەنجام ئالوگوڕ لە مەرامنامە و پەیرەونامەێ ئەنجومەن.
ـ گوزارش ساڵانەی شەورای ڕێبەریی تاوتوی کەێد.
ـ بەرنامە و ئستراتژی کاری یەکساڵەی ئەنجومەن تاوتوی و پەسەند کەێد.
ـ شەورای ڕێبەری ئەنجومەن “کومەڵگای باوەری یارسان ـ ئروپا” هەڵوژنێد.
ـ بڕیاردەرە لە سەر دویایهاوردن وە کار ئەنجومەن
ـ پێشنیارەکان بایەد لاکەمەکەی دو هەفتە وەرجە کوبیین شەورای گشتی بڕەسێدە دەس شەورای ڕێبەری یا کۆمیتەی بەرگوزارکەر کوبیین شەورای گشتی.
- ۱۰ شەورای نائاسایی
ـ شەورای نائاسایی خاون دەسڵاتەکان شەورای گشتییە.
ـ شەورای نائاسایی لە تەنگامەتی و وە داوخوازی ٣/١ ئەندامەکان ئەنجومەن یا فرەتر لە نیمەێ ئەندامەکان شەورای ڕێبەری گیریەد.
ـ خوازیارنامە ئەرا گردن شەورای نائاسایی باید ویانکدار بود و وە نویسیاگی برسێدە دەس سۆخەنگو ئەنجومەن. ئەگەر داوخوازیەکە بابەتدار بود، شەورای نائاسایی لە ماوای ٢ مانگ لە شون هەناردن خوازیارنامەکە گریەد.
- ۱۱ شەورای ڕێبەری
ـ شەورای ڕەێبەری بانترین ئورگان دەسڵاتدارە لە بەین ٢ کوبیین شەورای گشتی
ـ شەورای ڕەێبەری لە ١١ کەس رێکخریاس.
ـ ٥ کەس لە ئی ١١ کەسە، شورای گشتی هەڵێانوژارێت، ئەو ٦ کەسەکە، هەناردە ئەنجومونگەل باوەری یارسان لە ووڵاتەگەل ئروپایین.
ـ هەرکام لە ئەنجومەنگەل باوری یارسان لە ووڵاتەگەل ئروپای ٢ هەناردە لە شەورای ڕەێبەری دێرێد.
ـ ئەگەر ئەنجومەن باوەری تازەیک لە ولاتێک ئروپایی دامەزریەت، ئەندامەکان شەورای ڕەێبەری زیادتروە بون.
ـ ئەندامەکان شەورای ڕەێبەری توانن لە نو ئەڕا ئەندامیەتی دەسنیشان بکریەن.
ـ هەر ئەندامێک لە شەورای ڕێبەری توانێدخوەێ جور سۆخەنگو ئەنجومەن دەسنیشان بکەێد.
ـ شەورای ڕێبەری خاون پەیڕەونامەی خودمالییە، وەسەرئیەیچوە لە چوارچو پەیڕەونامە ئەنجومەن کە شەورای گشتی پەسەندی کردگە دەرناچوت.
ـ تەڵاش کریەد کە بریارەکان شەورای ڕێبەری نەتیجە گوفتمان و سازگاری بود، بێئەوەێکە بنچینە دموکراتیەکان ژێرپا بکریەن.
ـ جارنامە ئەرا کوبیین شەورای ڕێبەری لە لای سۆخەنگووە هەنریەد و خوەیشی ڕێبەری کوبینەکە کەێد.
ـ جارنامە ئەرا کوبین شەورای ڕێبەری بایەد بەرنامە و وەخت کاری دیاریکریاگ داشتود.
ـ کوبینەکان شەورای ڕەێبەری و ئامادە بیین ٤/٣ ئەندامەکانی ئەنجام گرێد.
ـ پروتوکول کاری کوبینەکان شەورای ڕێبەری نویسیەت و لە لاێان سۆخەنگوە کەفێتە یەک و پەسەند کریەت.
ـ ئەگەر ٣ کەس یا زیاتر لە ئەندامان شەورای ڕێبەری داوخواز کوبین بون، شەورای ڕێبەری لە ماوای ٢ هەفتە، لە شون هەناردن داوخوازنامەکە کوبوتوە.
- ۱٢ کارکرد شەورای ڕێبەری
ـ هەدایەتکردن ئەنجومەن وەرەو ئاسو دیاریکریاگ.
ـ دارشانن بەرنامەی کاری ئەنجومەن.
ـ جێوەجێکردن بریارەکان شەوارای گشتی.
ـ شەورای ڕێبەری کەسێک جور ”سۆخەنگو ئەنجومەن” لە ناو ئەندامەکان خوەی هەڵوژنێد.
ـ سندن دەسڵات لە سۆخەنگو وە دەلیل ژێرپاکردن بریارگەل ئه‌نجومه‌نی و ڕوی دەنگ ٣/٢ ئەندامەکان.
ـ شەورای ڕەێبەری وە گەرد هەر کردەوەێک کە بنچینەگەل ئخلاقی و ئایینامە ژێرپا بکەێد هەڵسوکه‌فت کەێد.
- ۱۳ کارکرد سۆخەنگو ئەنجومەن
ـ شیوەکەر دیدگای ئەنجومونە روی وە دەیشت و ڕێکخەر پیوەندیەکانیە.
ـ لاکەمەکی یەک کەس لە ئەندامان شەورای ڕێبەری، سۆخەنگو لە کارەکانێ هامرایی کەن.
ـ سۆخەنگو وەیەکخەر پیوەندیگەل ئورگانی و کردەوەکان ئەنجومەنە.
ـ سۆخەنگو وەڕوی بریارەکان شەورای ڕێبەری و بریارە پەسەندکریاگەکان شورای گشتی کار کەێد.
ـ سۆخەنگو بایەد کوشش بکەێد ئەڕا بتەوکردن پیوەندێگەل هاوکاری و هاویاری لە بەین ئەندامەکان تا ئەساس سازگاری و یەکپارچەگی لە ناو ئەنجومەنەکە فراهەم باێد.
- ١٤ بابەتگەل ماڵی
ـ ئەنجومەن )شەورای ڕێبەری( خوەی هامیتەی کردەوە بازرگانی و ماڵیەکان ناکەێد.
ـ هەزینەی وەڕێخستن بونە جیاجیاکان و چالاکیەکان ئەنجومەن که‌فێته سه‌رشان خود ئه‌ندامان.
ـ ئەنجومەن خوه‌ێ هامێته‌ێ هەزینەگەل شەخسی ئەندامەکانێ ناکه‌ێت.
ـ ئەنجومەن سەرپەرەستی کردارگەل هاوبەش و گشتی کەێد.
- ۱۵ شیوازگەل گوڕانن پەیڕەونامەی ئەنجومەن
ـ پێشنیارەکان بایەد لاکەمەکەی دو هەفتە وەرجە کوبیین شەورای گشتی بڕەسێدە دەس شەورای ڕێبەری یا کۆمیتەی ڕێکهاوەر کوبیین شەورای گشتی.
ـ پێشنیارەکان وە ٣/٢ دەنگ ئەندامەکان شەواری گشتی پەسەند کریەت وە هەر لە ئەو وەختوە پەیرەوی کریەد.
- ۱۶ کوتایی دایین وه کار ئەنجومەن
ـ ئەنجومەن توانید وە بریار ٣/٢ دەنگ ئەندامەکان شەورای گشتی یا شەوارای نائاسایی کوتایی وە کاری بیریەد.
- ١٧ پەیرەوی کردن لە بریارە پەسەندکریاگەکان
لە هەڵکەفت 14.01.2017 بەرابەر وە ٢٥ مانگ دەی ١٣٩٥ شەورای دامەزرنەر ئەنجومەن “کومەڵگای باوەی یارسان ـ ئروپا” لە ولات سوئد کوبینوە و ئەنجومەن “کوموڵگای باوەری یارسان – ئروپا” دامەزریا و هەر لە ئەو هەڵکەفتوە بریارەکانی بییە قابل پیرەویکردن.
