رۆژ ۳ دسامبر ۲۰۱۶ زایینی لە شار” سترنگس” وڵات سوئد ، ریکخراو” یاری کورد و پلاتفۆرم یارسان” سمینارێگ هاوبەش ئەڕا جوانەیل و خانوادەیل یارسانی و بڕێگ لە جوانەیل هەر چوار پارچەی کوردستان وەرێوە بردن.
سمینارەگە وە دەقەێگ بی دەنگی ئەڕا قەیرزانی لە یاد و هویرمان شەهیدەیل رێ ئازادی کوردستان شروو کرد.
لە شوونی وە نمایندەگی لە ریکخراو یاری کورد “هادی فەرزی کەواڵی” قسە ئەڕا بەشداربیەیل کرد.
هادی فەرزی لە بەشیگ لە قسەگانی وەت: ئەرا بەرقەراری پەیوەندیەیل نزیک و دەفاع لە فەرهەنگ و زوانەگەمان و پشتیوانی لە خواست و حقوق کۆمەڵگای یارسان، ئەی دیدارەیلە وە زەروور زانیم . کرید ئیمە جوور دو جەریان یارسان لە زمینەیل هاوبەش وە گەرد یەک هاوکاری بکەیم.
هادی فەرزی هەمیش وەت: باید لە وەرانوەر سیاسەت دوژمنەیل کورد وشیار بیم و ئجازە نەیەیم دوژمنەیل تەفرەقە لە ناوین خەڵکەگەمان دروس بکەی.
لە ئدامەی سمینارەگە هاوسەرۆک پلاتفۆرم یارسان “مهرداد ئەحمەدی” لە سەر رەوش ئیسەی ناوچەگە، کۆمەلگای یارسان و ئەهمیەت دروس بین پلاتفۆرم یارسان قسە کرد.
ناوبریاگ لە بەشێگ لە قسەیلی وەت: کۆمەلگای یارسان وە خاتر وەزیەت جوقرافیایی و رەوش ئێسەی ناوچەگە ئحتیاج وە پیوەندی وە گەرد چین و پێکهاتەیل ترەک دێری و لازمە گشت ریکخراوەیل یارسانی لە زمینەیل جیا جیا وە گەرد یەک هاوکاری بکەن.
لە لای ترەک، هاوسەرۆک پلاتفۆرم یارسان “ئەنەم کەرەمی” ، لە سیمینارەگە لە بارەی نەخش ژنەیل لە رۆژهەڵات کوردستان و بەرخوەدان ژنەیل لە رۆژئاوای کوردستان قسە و باسێگ پێشکەش کرد.
ئەنەم کەرەمی لە بەشێگ لە قسەیلی وەت: ژنەیل لە رۆژهەلات کوردستان سەربار فشارەگان رژیم ئێران پاوەگەزدان کەن و ئرادەی خوەیان تەسلیم سیاسەتەیل رژیم ناکەن.
کەسێگ جور “زەینەب جەلالیان” کە ساڵیان فرەێگە لە ژیر سەخترین شکەنجە و فشارەیل رژیم ئێران تویش نەخوەشی بییە، وەلێ هێمان پاوەگەزدان کەی.
هەر وەیجوورە لە رۆژئاوای کوردستان دیمن ژنەیل روڵ ئەساسی لە شۆڕش داشتن، ژنەیل لە رۆژئاوا ئرادەی ژن کورد وە جەهان سابت کردن و بینە نماد بەرخوەدان.
لە بەش ئاخر سیمینارەگە جەوانەیل یارسانی لە فەزاێگ دووستانە گەرد یەکا گفتۆگۆ کردن و نەزەر و تەفرەنجەیل خوەیان هاوردنە سەر زوان.
