مێوانە بەرێزەکان، خوەیشک و برایەل عەزیز،ئەحزاب سازمانەیل کوردستان،فرە بەختەوەریم لە وەێک کە ئیوەێ ئازیز لە ساتە وەختێک ئیجورە سەرنوشت ساز لە کنار خوەمان دوینیم.
بێگومان ئێحساس مەسعولیەت کردن ئیوە وە بەشدار بینتان لە ئی کونگرە بوتە هوێک ئەرا دوڵەمەن بیێن مەسیر ئازاد خوازی وڵاتەکەمان.
ئازیزان دەنگ و رەنگ مەردم مەزڵوم یارسان(کاکەیی) دەنگ و رنگێکی هەمیشە مقاوم و دانەبریاگ بیەس لە ملەت و نیشتمان کورد.
مێژوو شاهدی ئەوە ئەرامان دەێت کە چە جوور یارسانیەکان لە ژێر فشارێکی سیستماتیک بینەس و هەوڵ پاکتاو کردن ئایین و فەرهەنگێان دریاێەس.
بێشک زوڵمێکی مەزاعف کە بەس وە خاتر یارسان بین و کورد بین وە مەردم کورد یارسان چوت لە کەس شاراوە نیە.
رێکخراو یاری کورد جور نمایندەێ مەردم کورد یارسان وێراێ مەحکوم کردن نەو تەبعیز و ناعەداڵەتی نسبەت وە ملەت کورد وە گشتی و کوردان یارسان وە تاێبەتی،داوا لە تەمام سازمان و ئەحزابەیل کوردی کەێت ئەرا ریشەکەن کردن ئی ئافاتە کە ریشە لە مەزهەب و ئفراتگەری دێرێت بێدەنگ دانەنیشن و ئجازە نەێەن هیچ کەس وە خاطر ئاین یا قەومیەتێ مەورد بێهورمەتی و تەبعیز قەرار بگریت.
هێژاێان ،ئوستانەیل کرماشان و ئیلام دو ئوستان کورد نیشین،کوردستان روژهەڵاتن کە لە لەهاز تاریخی و مەوقیەت جوغرافیایی ئەهمیەت فەراوانێک دێرن.
ئوستان کرماشان جور ئوستانێک کورد نیشین کە وە هندوستان ئێران مەعروف بیەس لە لەهاز تەرکیب و بافت ئجتماعی و ئاینی غەنیترین مەنتەقەس کە نەک هەر لە کوردستان بەڵکوو لە تەمام ئێران کەم نەزیرە و ویژەگیەیل خاس خوەێ دێرێت.
دانیشتوان مەنتەقەێ کرماشان وە لەهجەێەل جوراو جور کوردی،جور کەڵهوری، گورانی ،لەکی و جافی قسە کەن و ئی فرە رەنگی و فرە شکڵیە زوانیە و ئاینی و قەومیە کە ویژەگیەل خاس وە مەنتەقەکە بەخشیە و بیەسە باعس دەوڵەمەن بین شارە کورد نشینەکەمان کرماشان و لە راسیا توانیم وە جورعەتوە بویشیم کە لە تەمام خاوەر میانە کەم نەزیرە.
ئی ویژەگیەلە کرماشان و ئیلام کردێەسە گوڵستانێک لە یەک باخچە و بیەسە ئفتخارێک ئەرا دانیشتوان مەنتەقەکە و توانیم وە شانازیوە بویشیم کە دیگران باێەد بان لە مەردم کرماشان و ئیلام دەرس ئتهاد و زنندگی مساڵمەت ئامیز لە کنار یەک یاد بگرن.
یاری کورد ئەرا هفز هورمەت و بافت اجتمائی،مەزاهب و ئەقەلیەتەیل جورا و جور دیار کرماشان بێ وەقفە تەڵاش کردێە، ئەرا پاراستن ئی سەرماێەێ گەوەرەێ فەرهەنگیە کە دوشمەنان ملەت کورد نەتوانن ئی فرە رەنگیە لە مەنتەقەکەمان کەم رەنگ بکەن و لە ناوێ بوەن و وە مەرامەکانێان برەسن ئەویچ تەفرەقە خستنە لە ناو ماڵ کورد بێوچان تەڵاش کردێگە.
رێکخراو یاری کورد (یارسان) جور جەریانێک کە دەفاع لە حقوق سیاسی و فەرهەنگی دانیشتوان ئیلام و کرماشان کەێت داوا لە تەمام دڵسوزان وە فعالین سیاسی و فەرهنگی ملەت کورد و مەنتەقەێ ئیلام و کرماشان کەێت کە هەرەشەی دوژمنان نەتەوەکەمان وە گشتی و جمهوری ئسڵامی وە تاێوەتی جدی بگرن و نەیلن دوژمنان وە مەرامەکانێان برەسن کە ئاژاوە دورست کردنە لە بەین گوڵە رەنگاویەکان وڵاتمان.
ئیمروژ ئیمە جور ملەت بندەست کورد زیاتر لە هەر زەمانێک نیاز وە هەمبەستەگی و ئتهاد دیریم و تەقویەت کردن خاڵە هاوبەشەکانمان توانێت رەوەند رەسین ملەتەکەمان وە ئارەزوەکان نزیک بکەێت و هیچ زوردارێکیچ نەتوانێت لە نواێ ئرادەێ گەورەمان خوەێ بگرێت.
ئەرا بیمە کردن فکر ئازادی خوازی و ئەداڵەت ئجتمائی لە تەمام کوردستان کە ئوستانەل کرماشان و ئیلام بەش ئەزیمێکن لە لەهاز جوغرافیایی و مەردمی و لەهجەیی،وەزیفەێ تەمام رەوشەنفکرەیل و ئازادی خوازان کوردە کە تەمام تەڵاشێان بخەنە گڕ ئەرا هفز خواستەێەل بەرهەق مەردم ئیلام و کرماشان .
هەر ئەو جورەێکە لە ئپتداێ ئی نویسینە هاتێە کە کرماشان و ئیلام جێ ژیان موشتەرک گوڵە رەنگاویەکانە و شون و مەکان هەمیشەی کوردیشە وە داخوە کە همیشە لە تەرەف دەوڵەتان ئشغاڵگەر کوردستان و هێزە کوردیەکانیچوە وە دەس فراموشی سپێریاگە و هیچ ئاورێک لە لێ نەێریاگەسوە و فرە جار قوربانی جەنگەیل ماڵ وێرانکەر بیەس.
مەردم یارسان کە بەشێک دانەوریاگ لە ملەت و خاک کوردن و ئیلام و کرماشان جێ ژیانێانە ، کامڵەن لە ژێر فشار مزاعف رەنج بردنە و بەن جێ خوەێە کە ئاورێکی جدی لە ئەوان بێریەتوە.
بەرێزان هەر ئەو جورەێک ئاگادارن ئاینی یاری فەلسەفە و فەرهەنگێکە کە تاێوەتە وە خاک و نیشتمان کورد و بەشێکە لە تاریخ و مبارزەێ باوک و باپیرانمان زد شەو پەرستان زەمانە کە ئەرا هفز کردن پیروزیەل وڵات کوشانە و کوڵ نەێانە.
ئی ئاین و فەرهەنگە کە رەساڵەت و ئەساڵەتێ کوردیە ،دایم مەورد هەمڵەێ نەێاران قەرار گردێە و هەمیشە بێرێزی وە بێ هورمەتی وە ئاینەکە و پەیرەوان ئی ئایین کوردیە کریاێەس.
یارسانەکان هەمیشە ئەرا مەنن خوەێان و پاراستن ئاین کوردان شورش کردنەس و کول نەێانەس نمونەی ئەو کوڵ نەیانەش شورش یارسانەکانە زد دەوڵەت جمهوری ئسڵامی ئیران لە مودەت ٣٨ ساڵ گوزەشتە و سێ ساڵ ئەخیر لە شارەکان هەمەدان و سەحنە و کرماشان کە جوانەیل کورد یارسانی وە سوزانن گیان خوەێان وەتن ئیمە دی زوڵم و زور و ناعەداڵەتی لە هیچ کەس قەبول ناکەیم.
ئایین یاری وە گشت شیوەێک لە تەرەف دەوڵەت جمهوری ئسڵامی ئێرانوە نادیدە گریاێەس و قەبول ناکریەت و لە قانون ئەساسی ئێرانیج هیج ناوێک لە لێ نەهاتێەس و یارسانەکان هەم جور کورد و هەمیش جور کافر مەورد تەبعیز و بێهورمەتی قەرار گردنەس و تەنیا چشتێک لە تەرف مەلاکان ئێرانوە جور ئەرمەغان ئەراێان دیاری کریاگەس ئەویچ کوشتن،زندان،شکەنجە،بێسەر و شوێن کردن و بێکاریە.
ئەوەێ ئەرا ئیمە فرە جێ داخە و ئازارمان دەێت کە لە سەرزەمین ئەژدادی خوەمانیج کوردستان لە هیج دام و دەزگاێک ناومان نەهاتێەس و هیچ هەق و هقوقێک نەیریم و هەر کەسێک شەوەکی زوی بچوتە ناو مەسجدێک توانێت فتواێک زدمان دەر بکەێت و جور کافر و شەێتان پەرست و گەڵاو ناو لە لیمان بوەێت بێ ئەوەێ کەسێک بتوانێ بویشێت پشت چەوێان ئەبروە.
یاری کورد ئەرا رەسانن دەنگ رەواێ کوردان یارسان (کاکەیی) هیچ وەخت قافڵ نەویەس و تا ئەو جێکە توان داشتێگە بێ وەقفە تەڵاش کردێگە و لە ئەرکەکانێ ئەرا رەسانن دەنگ مەزڵومیەت مەردم کورد یاری لە هەر دەرێک داێەس نمونەێ بویچک کارەکان یاری کورد سەردان پارلمان بریتانیا،پارلمان نوروژ،سەردان دو وەزیر خارجەی نوروژ ،سەردان هێزە کوردستانیەکان و فرە لە کەسایەتیە خاون بریارەکان گورەپان سیاسی کوردستان.
ئیمروژ ئیمە جور رێکخراو یاری کورد داوا لە گشت هێزە کوردستانیەکان و ملەت کورد کەیم کە نەک تەنیا هاوکار ئیمە بوون ئەرا پشتیوانی و هفز کردن ئاین و فەرهەنگ یارسان بەڵکوو خوەێان جور ئەرکێک ملی خاونداریەتی لە یارسانەکان بکەن چویکە فەرهەنگ و ئایین یاری بەشیکە لە تاریخ و داب و نەریت نیشتمان کورد کە دایمەن دوژمنان هەوڵ لە ناو بردنێ دانەس بەڵام کوردان یارسان وە شوجاعەت خوەێان ئەو گەنجینە گەورەێە ئەرا ئیمە پاراستنە و نەهیشتنە لە ناو بچوت کە ئیمەیچ ئیمرو شانازی وە پێوە بکەین.
رێکخراو یاری کورد
٣١.٧.٢٠١٦
نوروژ
