بیستی مانگی ٩/٢٠١٤، هەرچەند تازە نوشتەرگەری کرابووم، لە رێورەسمی ساڵوەگەڕی شەهیدبوونی هاوڕێ نەمر دوکتور سادق شەرەفکەندیدا، وەک ئەرکی نەتەوەیی وهاوخەباتی، بەشداریم کرد.

بەڕێوەبەری بەرنامەکە ئەندامی کۆمیتەی حیزبی دێموکراتی کوردستانی ئێران بوو، لە دەسپێکی بەرنامەدا کە بە شێوەی سمینار بەڕێوە ئەچوو، هات بە شان‌و باڵی بەرێز کاک موحەممەدی موهتەدیدا کە ناوبراو یەکێک لە هاوڕێ دێرینەکانی شەهید شەرەفکەندییە وئێمە گەلێک بەخێرهاتنی ئەوبەرێزە دەکەین‌و… تائێرە، ئەو پەسن بێژییە بەلامەوە سەیر نییەوئەو دوو کەسە هاوڕی بووگن‌و جێ خۆیەتی یادی بکرێ. بەڵام ئەوەی بەلای منەوە دوور لە رەوشتی مرۆڤایەتی‌و ئەمەگناسی بوو، ئەوە بوو، ئەگەر هاوڕێیەتی، ئەو شەهیدە بۆ کەسێک مایەی سەربەرزی ورێزدانانە کە هەیە، خۆ من زیاتر لە سێزدەساڵ لە نزیکەوە، لە گەڵ ئەو شەهیدە هاوکارو هاوخەبات‌و هاوچارەنووس بووگم. چ رۆژان وشەوانێکی سەختی پێشمەرگایەتیمان پێکەوە تێپەڕکردووەو لەو ساڵانەدا کە پێکەوە خەباتمان ئەکرد، ئەوە من بووم، لەگەڵ ئەو بووم وئەوە ئەوبوو، هاورازی من و هاوڕێیەکانی‌تری بوو. ئەوە من بووم لە تۆپ‌و خۆمپارەبارانی رژیم بۆ سەربنکەی رادیو وئینتیشارات لە پەنادەستی دوکتوردابووم، ئەوە من بووم لە ژێررهێڵەی کاتیوشا و بارانی پایزیی وبێ سەرپەنا لە ژێر ساباتی نایلۆندا، بەرنامەی رادیوم ئەخستە ژێرچاوەدیرییەوە بۆ ئەوە بێ هەڵە دەنگی زوڵاڵی مافخوازانەی نەتەوەکەمان بە گوی کۆمەڵانی خەڵک بگا. ئەوە من بووم لە گەورە دێ دوای دووکاژێر تۆپ‌و کاتیشاو فسفوربارانی رژیم بۆسەر بنکەی دەفتەری سیاسی، لەگەڵ ئەو شەهیدە دەست لە ناودەست سەردانی بنکەو ماڵەکانی حیزبمان کرد بۆ ئەوە بزانین، ئەو جەللادانە چییان بە سەرهێناوین. ئەوە ئەو بوو کاتێک ژن‌و منداڵەکەمیان خستە بەندیخانەو دواتر، لە کوردستان دووریان خستەوە، دلداری دەدامەوە کە خەبات ئەو شتانەشی بە دواوەیەو دەبێ خۆڕاگربی. ئەوە من بووم لە قەندیل کاتێک فڕۆکەی ئاخوندەکان هات بۆ بۆمبابارانی دەفتەر، شان بەشانی ئەو شەهیدە، خەڵکی کەمئەندام‌و نەخۆشمان بەڕێ ئەکرد بۆ کونەتەیارەکان و پێشمەرگە بە زۆر هەر دووکمانیان ئەخستە نێو کونەتەیارەوە بۆ ئەوە بمێنین بۆ درێژەدان بەخەبات. ئەوە من بووم دوای شەهید بوونی هاوڕی مەزن دوکتور قاسملو، لەگەڵ دوکتور شەرەفکەندی پەیمانم نوێ کردەوە چاو ودەست و مێشک ولاقی ئەو بم، بۆ ئەوە هەست بە جێگای بەتاڵی ئەو شەهیدە نەمرە نەکەین. دوای ئەو کارەساتە، ئەوە ئەو بوو، هەر بڕیارێکی بدایە، بە منی دەگوت: «براگیان ئەو کارەت پێی چۆنە؟» ئەوە ئەوە…

پرسیار ئەوەیە، نەدیتنی ئەو راستییانە، لەگەڵ ئەوەدا، دەیانزانن، بەری چ تێرامان‌و ئەمەگناسییەکە؟! ئەمە واتای چەواشەکردنی مێژوونییە!؟ بۆ؟ لەبەرئەوە چەند ساڵ پێش لە رێورەسمی یادەوەری شەهیدی نەمر دوکتورقاسملودا گوتم، هەر چەند سەد لە سەدا، دوژمن تاوانبارە، بەڵام نابی ئێمەش زەمینە بۆ ئەنجامدانی جینایەتێکی وەها بۆ دوژمن بخولقێنین!

لە رێورەسم‌و رێپیوانی ئەمساڵدا سەبارەت بە شەهیدکردنی نەمردوکتورقاسملو، ئەندامێکی ئەو حیزبە، پێوتم، تۆ بۆ لە تیشکدا، دەرناکەوی؟! من پرسیارم کردووە وتوویانە، فڵانی گلەی هەیە لە حزبەکەی‌و دوورییمان لێدەگرێ، منیش وتم، تۆ پێت رەوایە، من بچمە بەر دەرگای تیشک‌و لە کاربەدەستەکانی بپاڕێمەوە بێژم، بەرنامەم بۆ دانێن با دەرکەوم؟ گوتی نە. گوتم، کە بانگم نەکەن چلۆن لەو کاناڵەوە دەرکەوم!؟ ئەم هەڵوێستە، ئەویش لەلایەن رێکخراوێکەوە کە ناوی «دێموکراتە»و بۆ دابەزاندنی پرەنسیپەکانی دێموکراسی لە وڵاتدا، دەیان هەزار کەسی کردووەتە قوربانی‌و بۆ گەیشتن بە ئازادی پڕ بە پێستی نرخەکەی داوە، چەندە دێموکراتیکە!؟

من، نیازم بە پەسنبێژیی نییەو زیاد لە بەژن‌و باڵای خویشم، لێرەو لەوێ، هەم دەرکەوتووم‌و هەم بەهۆی نووسینەکانمەوە، دیارتر بووم، بەڵام ئەو ڕقە ناپەسندە نادێموکراتیکە، لۆ؟ ئەویش بۆ کەسێک هەیی‌و نەیی خۆی لە رێگای ئامانجی ئەو شەهیدانەدا داوەو بە نیوە فەلەجی‌و ئاوارەیی‌و دوور لە خزم وکەسوکارو زێدەکەی، هەڵوەدای هەندران بووەو لەوانەیە تامردن داخی دیتنی ئەوانەش بەرێتە ژێر گڵ! بۆیە ئەوچەند دێرەم وەبیر هاوڕێ دیموکراتەکانم! هێنایەوە تا ئاگادار بن بەری خۆر بە بیژنگ ناگیردری‌و مێژوویش بۆ ئەوان چەواشەناکرێ.
حوسێن خەلێقی

٢٩/٩/٢٠١٤، سوید، ستوکهوڵم.

Likes(0)Dislikes(0)