داعش بە هۆی باکگراوەندە ئایینیە توندڕۆییەکەی، بە ئاسانی دەتوانێ بیانوو بدۆزێتەوە بۆ کوشتنی پەیڕەوانی ئایینەکانی دیکە و هەر کاتێ دەرفەتیان بۆ رەخسابێ دوو دڵیان نەکردووە .

ئەوەی لەم رۆژانە بەسەر خانەوادەی حسامەددین کاکەیی لە گوندی(تەپەی دووسەر)ی کاکەیی نزیک داقوق هات، جێگەی لێکۆڵینەوە و هەڵوەستەیە. با زانیارییە هەواڵگرییەکان لە راپۆرتەکەی پەیامنێرەکەی رووداوەوە وەربگرین کە جێگەی گومانی گەورەیە کە داعش لە رێی ئەو راپۆرتەوە زانیاری پێویستی دەستکەوتبێ بۆ زەمینە سازی بۆ کۆمەڵکوژی ئەو خانەوادەیە:
– راپۆرتەکە دەڵێ گوندەکە تەنیا سێ کەسی تیا دەژی کە ژنێک و منداڵێک و پیاوێکی پیرن بە دوو سێ کلاشینکۆفی کۆنەوە. ئەو خانەوادەیە کاکەیین، گوندەکەیان تەنیا دوو سەد مەتر لە سەنگەرێکی داعشەوە دوورە کە بە خەمڵاندنی خانەوادەکە نزیکەی سی چەکداری داعش لەو خاڵە سنووریە هەن. ( تێبینی: من نازانم کە داعش هێشتا لەو خاڵە ماون یان نا؟ ئایا ئەو راپۆرتەی رووداو لەم رۆژانەی رابردوو بڵاوبۆتەوە یان نا؟ ئایا لە دوای ئەو راپۆرتە سەنگەری پێشمەرگە و داعش لە نزیک ئەو گوندە گۆڕانکارییان بەسەر هاتووە یان نا؟). راپۆرتەکە دەڵێ گوندەکە پێشمەرگەی لێ نیە و ئەو خانەوادەیە داوای پاڵپشتیان کردووە لە پێشمەرگە کەچی رەتکراونەتەوە.
– ئەو زانیارییانە بە راستی زانیاری میدیایی نین بە قەد ئەوەی زانیاری هەواڵگرین بە تایبەت کە هێشتا شەڕ تەواو نەبووە. ئەو زانیارییانە ئەوکاتە گرنگ بوون بۆ بڵاوکردنەوە ئەگەر هەڕەشەی داعش لەو ناوچەیە نەمایە و ئەو خانەوادەیە راگوێزرابوونایە بۆ ناوچەیەکی ئارام. ئەو هێزانەی لە سەنگەری دژ بە یەکن بە پارەیەکی زۆر زانیاری وا دەیکڕن نەخاسمە لە راپۆرتێکی تەلەفزیۆنی بە خۆڕایی دەستیان بکەوێ. لەمەدا بەرپرسانی رووداو و ئەو پەیامنێرە لە بەردەم بەرپرسیارێتیەکی قانونی گەورەدان و دەبێ وەزارەتی پێشمەرگە لێکۆڵینەوەی جددی لەو پرسە بکات کە بە لایەنی کەم بووە هۆی شەهید بوونی سێ هاوڵاتی کوردستان و دەستگیرکردنی چەند هاوڵاتیەک.
– راپۆرتەکە دەڵێ داوای ئەوە کراوە پێشمەرگە بچێتە ئەو گوندە. کە پێشمەرگە نەچوون رەنگە هۆکاری ئەمنی هەبێ کە ئێمە نەیزانین و بەجێهێڵدراوە بۆ بەرپرسە سەربازییەکان. بەڵام چۆن رێگە دراوە خانەوادەیەک لە نێو جەرگەی شەڕ بمێننەوە کە گومانی تیا نیە بە هۆی ناسنامەی ئایینیان هەمیشە هەڕەشەی جددی لەسەر ژیانیان هەبووە. لەمەدا بەرپرسانی سەربازی و ئیداری ناوچەکە دەبێ لێکۆڵینەوەیان لە گەڵ بکرێ کە کەمتەرخەمییان کردووە لە پاراستنی ئەو خانەوادەیە.
– هێزی پێشمەرگەی کوردستان قارەمانێتی زۆری نواندووە بۆ پاراستنی کوردستان لە شەڕی داعش و لەمەدا جێگەی دەستخۆشی و رێز و ستایشن. بەڵام ئەو دەنگوباسانەی لە سنووری کەرکوک بڵاو دەکرێنەوە ( کە جێگەی لێکۆڵینەوەن و ناتوانم پشت راستیان بکەمەوە) هی ئەوەن کە بەرپرسە سەربازییە باڵاکانی کوردستان، بە تایبەت هی هەردوو حزب بێنە سەر خەت. ئەوەتا بەڕێز شوان داودی ئەندامی پارلەمانی عێراق لەسەر لیستی یەکێتی لە کەرکوک دەربارەی ساتی شەهیدکردنی ئەو خانەوادە کاکەییە نوسیویەتی: “لە هەمان رۆژ دوو هێز لە لەسەر بیرێكی نەوت خەریك بوو شەڕی نەگریسی براكوژی هەڵگیرسێنن”. هەندێ پەیجی دیکەش باسیان لەوە کردووە کە هەندێ لە فەرماندە سەربازییەکانی ناوچەکە خەریکی کێشەی سیاسی و نەوتی نێوان پارتی و یەکێتین. من نامەوێ لە گەورەیی ئەرکی پێشمەرگە و فەرماندەکانیان کەم بکەمەوە کە جێگەی شانازیی و گەورەیین، بەڵام داوا دەکەم وەزارەتی پێشمەرگە و فەرماندەیی هێزە چەکدارەکانیهەرێمی کوردستان لێکۆڵینەوە لەو دەنگۆیانە بکرێ و شەهیدکردنی ئەو خانەوادە کاکەییە وەکو رووداوێکی ئاسایی سەیر نەکرێ چونکە کەمتەرخەمی میدیایی لە راپۆرتەکەی رووداودا هەیە کە زانیاری وردی بە دوژمن داوە و کەمتەرخەمی سەربازی و ئیداریش هەیە لە پاراستنی ئەو خانەوادەیە بەوەی دەبوایە رێگە نەدرێ بە دوو سێ چەکی کۆنەوە ( وێڕای رێز بۆ هەستی نیشتیمانی و دڵسۆزیان) ژیانی خۆیان بخەنە مەترسییەوە.
– دروود بۆ گیانی خانەوادەی حوسامەددین کاکەیی وهیوادارم ئەم رووداوە لێکۆڵینەوەی لێ بکرێ بۆ ئەوەی ببێتە دەرس و بەر لە دووبارە بوونەوەی بگیرێ.

کاکی رۆستەم ئەلماسی دەستەیی بەریوەبەری ریکخراوی یاریکورد .

Likes(3)Dislikes(0)