شاناز ئیبراهیم ئەحمەد، پەیامێکی لەبارەی شەهید زەکی شەنگالی-یەوە بڵاوکردەوە، کە تیایدا ڕەخنەی توند لە حزبەکانی باشوری کوردستان دەگرێت، کە هیچ هەڵوێستێکیان دژ بە دەوڵەتی تورک نەنواند و تەنانەت پرسەنامەیەکیشیان بۆ شەهیدبوونی شەنگالیی نەنووسیی. 

دەقی پەیامەکەی شاناز ئیبراهیم ئەحمەد، بەرپرسی کۆمیتەی دەرەوەی یەکێتی نیشتیمانیی کوردستان لەبارەی شەهیدکردنی زەکی شەنگالی، ئەندامی کۆردیناسیۆنی جڤاکی ئێزدیی و ئەندامی کۆنسەی بەڕێوبەریی کەجەکە لەلایەن دەوڵەتی تورکەوە.

قەشە ئەمریکیەکە و زەکی شەنگالیەکەی ئێمە..

ئەمەریکا لەسەر دەستگیرکردنی قەشەیەک شەڕێکی سەختی ئابوری دژ بەتورکیا دەستپێکردووە ، بەھای لیرەی ڕسواکرد و ئەردۆغان و دەوڵەتەکەی کردە پۆڕی خوراو ھێندەی نەمابوو فاتیحەی لەسەر بخوێنین ، تەنھا بەمەبەستی پاراستنی شکۆی ھاوڵاتیەکی ئەمەریکی و دانانی سنوورێک بۆ سەرەڕۆی و دەستدرێژیەکانی ئەردۆغان و دەوڵەتەکەی ..!!
کەچی ببینن بەبەرچاوی خۆمان و دنیاوە چەندین ڕۆڵەی ئێمە ( زەکی شەنگالی و ھەڤاڵەکانی ) لە شەنگال شەھیدکران بزانە تەنانەت پرسەنامەیەکیشمان نووسی ؟!
ئه‌وه‌تا….ئەردۆغان بەبێ سڵ کردنەوە شانازی ئه‌کات بە کوشتنی ڕۆڵەکانمانەوە و خۆی وێنە و ڤیدیۆی شەھیدکردنی سەرکردەی نەتەوەیی و سمبولی بەرخۆدانی گەلەکەمان بڵاو ئه‌کاتەوە .!! ئێمەش پاش بینینی ئەو دیمەنانە و تەواو بوونی دراما تورکیەکە بە تیشێرت و پانتۆڵ و جوتێک کالەی تورکیەوە ئه‌چینە مارکێت و مۆڵەکان و عەرەبانەکەی دەستمان پڕ ئه‌کەین لەخواردن و خواردنەوەی تورکی ھەر لە دۆشاو و برنج و نیسک و نۆک و شیرەوە ھەتا قاپ و قاچاخ و مه‌وادی پاکردنەوەی ماڵ ..!! دواتریش بۆ مۆبیلیات و ئێکسسواری ماڵ و کەل و پەلی تر سەرێک لە سەنتەرەکانیان ئه‌دەین و دار و دیوار و ئەرزی ماڵەکانمان بە ( مه‌ید ئین توركی) ئه‌ڕازێنینەوە وەک ئەوەی كه‌ نە بامان دیبێت و نە باران….
ئاخر ئەو بێهەڵوێستی و سەرکزیە وائه‌کات ھیچ ئیعتبارێکمان نەبێت و خوێنی ڕۆڵەکانمان ھێندە ھەرزان بێت و زوو ووشک بێتەوە بەبێ حەق و حیساب…
هه‌ر ئه‌وه‌شه‌ وای كردوه‌ كه‌ هێزێكی زۆر له‌ سنوری سلۆپی و گێمان و جزیره‌ كۆبكاته‌وه‌ و هه‌ر كاتێك ویستی هێرش بكات بیكات ….
ئاخر ئەوان باش ئه‌زانن ئێمە بایی چەندین، باش ئه‌زانن کوێخا و ئاغاکانمان موریدی خۆیانن و بەیەک فیکە لەسەر یەک قاچ بۆیان ئه‌وەستن ..!!

باش ئه‌زانن سەدان کوردیش تیرۆر بکات چەندین ڕۆڵەشمان شەھید بکات و هه‌موو خاكه‌كه‌شمان ببێژێت و داگیری بكات… کەس فزەی لێوەنایەت چونکە ئێمە لەناوخۆماندا یەک نین.. ئێمەین کەڕ و لاڵ و کوێر بووین لەپێناو بەرژەوەندیەکانمان ، ئێمەین ناتوانین سەرکزی بە سەربەرزی بگۆڕینەوە.. ئێمەین نامانەوێت کۆت و بەندی ژێر دەستی بپسێنین و بۆ ئازادی و سەربەستی گەلەکەمان قوربانی بدەین ..!!!! ئێمه‌ین كه‌ له‌ فه‌رهه‌نگه‌كاماندا چیتر خۆشه‌ویستی بۆ خاك و گه‌ڵ و نیشتمان به‌دی ناكرێت ….
ئەم دۆخە تاکەی بەردەوام دەبێت ؟ دیوەخانەکەی پەرلەمان کەی دێتەدەنگ ؟ فراکسیۆنەکان ؟ حیزبەکان ؟ سیاسیەکان ؟ ڕۆشنبیر و چالاکوانان ؟
كه‌ی دێنه‌ ده‌نگ ؟؟ ده‌ ورنه‌ ده‌نگ با ڕشتنی خوێنی ڕۆڵەکانمان ھێندە ئاسان تێنەپەڕێ و چیتر ئەو دەستدرێژیانە قبوڵ نەکرێ …
ئه‌رێ ئێوه‌یه‌ك كه‌ خۆتان كردوه‌ته‌ ڕابه‌رو ده‌مڕاست و نوێنه‌رمان به‌راستی پێتان وایه‌ كه‌ بتوانن مافی گه‌له‌ خێر له‌خۆ نه‌دیوه‌كه‌مان بستێنن له‌ كاتێكدا كه‌ له‌ نوسینی پرسه‌نامه‌یك بترسن ؟؟

هه‌زاران سڵاو له‌ گیانی پاكی زەکی شەنگالی و ھەڤاڵەکانی..
ڕوحتان شاد و ئاسودەبن..
دڵنیابن كه‌ هه‌زاران کوڕ و کچی ئازا کاروانی تێکۆشانی ئێوە درێژە پێدەدەن….

نه‌فره‌ت له‌ كه‌وا سوورانی به‌رله‌شكری داگیركه‌ر ..!!‌

ڕۆحت شاد كاكه‌ زه‌كی…………………………

شاناز ئیبراهیم ئه‌حمه‌د

Bildet kan inneholde: 1 person, utendørs

 

Likes(0)Dislikes(1)