بەیانیەی پلاتفۆرم یارسان دژ وە هێرش پارتی ئەڕا سەر شنگال

0
372
پلاتفۆرم یارسان هێرش پارت دموکرات کوردستان عەراق ئەڕا سەر شنگال و دەسکەفتەکانێ مەحکوم کەێد و ئەو هێرشە لە قازانج دژمنەیل گەل کورد زانێ.

لە وەختیکە گەل کورد نیاز وە یەکیەتی نەتەوەیی و یەک رزی ئەڕا وە دەس هاوردن مافەیل خوەی دێرێ ژماریگ پارت و لایەن خەریک ئاژاوەگەرین لە ناو کۆمەڵگا. لە ناو رووژەیل وەرین هێز چەکداریک سەر وە پارت دموکرات کوردستان عەراق و سازمان میت تورکیە هێرش کردنەسە سەر خەڵک شنگال و هێزەیل پارێزین ئەوان، ئی کردەوە لە وەختیکە ئەنجام گرێ کە خەڵک شنگال لە مانگ ئاگوست ساڵ 2014 لە لایەن چەتەیل داعش هێرش کریا سەریان و وە بی هویچ پاوەگەزدانێک پێشمەرگەیل پارت دموکرات کوردستان عەراق شنگال وە جی هیشتن و خەڵک ئێزەدی لە پیر، جوان، ژن، مناڵ کۆمەڵکوش کریا و تەنانەت تا ئیسەیش وە سەدان ژن و مناڵ ئێزەدی ها لە ژیر مرک چەتەیل داعش. پارتی لە جیایەتی ساڕێژ کردن زامەیل خەڵک ئێزەدی هێرش کەێدە سەریان و وە تەماس کۆمەڵکوشی ترەک لە سەر خەڵک ئێزەدی ئەنجام بیەد بەڵام ئیجارە وە دەس کورد. هێرش کردن ئەڕا سەر خەڵک ئێزەدی لە لایەن پارت دموکرات کوردستان عەراق نە تەنیا لە قازانج گەل کورد نیە بەلکو دژ وە یەکیەتی نەتەوەیی گەل کوردە و خزمەت وە داگیرکەرەیل و دوژمنەیل کەێد. ئیمە جوور پلاتفۆرم یارسان وە توندی کردەوەی پارت دموکرات کوردستان عەراق دژ وە خەڵک ئێزەدی مەحکوم کەیم و پشتیوانی خوەمان لە خەڵک ئێزەدی و یەکینەیل بەرخوەدان شنگال ئیلان کەیم

دەستەی وەڕێوەبەری پلاتفۆرم یارسان