که‌مپینی به‌رگیری له‌ گه‌نجانی یارسان (کاکه‌یه‌کان) ی ئیران
جارێکی دیکە، بەداخەوە، هەواڵ و باسی وەها گەیشتووە کە هەندێ …بەرپرس و دەزگای دەوڵەتی ئێران سووکایەتی بە دابونەریتی خەڵکی یارسانی ئێران دەکەن، کە لەم رۆژانەدا لە زینداندا سمێڵی گەنجێکی یارسانی (کاکەیی)یان، بە زۆر، تراشیوە، لە کاتێکدا دامو دەزگاکانی دەوڵەتی جمهوری ئیسلامی دەزانن، کە خەڵکی یارسان ئەو جۆرە دەسدرێژییە بە سووکایەتی بە کەرامەت و مافی مرۆڤ دەزانن.
وەک هەواڵەکان رایانگەیاند کە دوا بەدوای ئەو دەسدرێژییە گەنجێکی دیکەی یارسان خۆی سووتاندووە بۆ دەربڕینی پەستی و بێزاری بەرانبەر بەو کردارە.
جا ئێمە کۆمەڵێک خەڵکی هەرێمی کوردستان، بە کاکەیی و دۆستانی کاکەییەوە، بێزاری و نارەحەتی خۆمان بەرانبەر ئەو رووداوە دزێوە دەردەبڕین و را دەگەیەنین:
1ـ ئەو دەسدرێژییە دەرهەقی کەرامەت و مافی شەخسی ئەو گەنجە یارسانییە مەحکوم دەکەین و داوا دەکەین دەزگاکانی دادوەری ئێران لێی بکۆڵنەوە، ئەنجام دەران بدۆزنەوە و سزایان بدەن.
2ـ بە بڕیارێکی فەرمی دەوڵەتی ئەم جۆرە دەسدرێژیانە بنەبڕ بکرێتەوە و، جارێکی تر دووبارە نەبێتەوە.
بەداخەوە بیستوومانە کە ئەو کردارانە چ لە ناو زیندانەکان یا دەرەوە، بەردەوامە و، هەندێ کەس و دەزگای ناو دەوڵەتی ئێران بە رق و کینەوە هەڵس و کەوت لەگەڵ یارسانەکان (ئەهلی هەق)ی ئێران دەکەن و ئەشکەنجەی رۆحی و بەدەنی خەڵک دەدەن.
3ـ داواکارین لە کۆڕ و کۆمەڵەی ئازادیخواز و لێبوردەی خەڵکی ئێران و ناو دەوڵەت ئەم کردارانە مەحکوم بکەن و سنووری بۆ دابنێن. چونکە دەزانین کە زۆربەی خەڵکی ئێران، بە مەدەنی و حکومییەوە، پەست و بێزارن بەرانبەر ئەو کەسە دەمارگیر و توندڕەوانەی ناو هەندێ دەزگای دەوڵەت.
4ـ پشتگیری دەکەین لە داخوازییەکانی یارسانەکانی ئێران بۆ ئەوەی هەر جۆرە کردەوەی جیاوازیگەری دژیان رابگیرێت و، یەکسان ببن لەگەڵ هاووڵاتیانی ئێرانی بۆ دامەزراندن و وەرگرتنی پۆستی شایستەی حکومی بەپێی توانا و شارەزایی خۆیان. هەروەها یارسانەکان ئازاد بن لە خۆ کاندید کردن بۆ ئەندامێتی ئەنجومەنی شوورای (پەرلەمانی) ئێران و ئیدارەی شارەوانییەکان.
5ـ یارسانەکان داوایان لە دەوڵەتی ئێران کردووە تا کێشەکانیان لە ریشەوە چارەسەر بکرێن، ئەویش دان بنرێ بە ماف و ئازادی کۆمەڵگای یارسان لە عیبادەت و رێوڕەسم و داب و نەریتە فەرهەنگی و ئایینییەکانیاندا. بۆ نموونە، دەیانەوێ هەر وەکو مەسیحی و یەهوودی و زەردەشتی و ئاشووری و ئەرمەنییەکانی ناو ئەو وڵاتە موعامەلە بکرێن کە لە مەجلسی شوورای ئێران (کۆتا)یان هەیە و بە فەرمی ناسراون و، ئازادن لە دابونەریت و عیباداتیان.
6ـ کۆمەڵگای یارسان خاوەن فەرهەنگ و عەقیدەی کۆنی کورد و ئێرانین و، بەشێکن لە فەرهەنگی رۆژهەڵات و جیهان، و هاوشێوە و نیزیکی فەرهەنگ و بیرو باوەڕی ئایینی زەردەشتی و، بەکتاشی و عەلەوی و دروزی و چەندین تایفەی دیکە لە تورکیا و پاکستان و ئەفغانستان و تاجیکستان و هیندستان و کۆمارەکانی قەفقازیا و بولگاریا و یۆنان و میسر و سوودان و چەندین وڵاتی دیکە. هەر بۆیەش دەڵێین کە ئەمە تەنیا گرفتی یارسان (کاکەیی) نییە، بەڵکو گرفتی سەرجەم گەلی کوردستانە.
سەرژمێری پەیڕەوانی ئەم رێباز و کۆمەڵگایانەی سۆفیگەری و عیرفانییە بە دەیان ملیۆن کەس دەبن.
7ـ جا هیوادارین جمهوری ئیسلامی ئێران، کە دۆست و هاوسێی گەلی کوردی ئێران و عێراق وتورکیایە، ئیتر رێگەی سووکایەتی کردن بە دابونەریتی یارسان (کاکەیی) نەدەن.
بەڵکو رێزیان لێ بگیرێت هەر وەکو خۆیان باوەڕیان پێیەتی، کە ئەوە پەیام و رێبازی رێکخراوی (یۆنسکۆ) و کۆمەڵگای جیهانی سەردەمە بۆ دان نان و رێزگرتنی گشت فەرهەنگ و باوەڕەکانی دنیا.
ئاشکرایە کە یارسانەکان کۆمەڵگایەکی ئاشتیخواز و مرۆڤ دۆستن و هەموو کەس و لایەنێک قبووڵ دەکەن و، دەیانەوێ بە ئاشتی و ئارامی لەگەڵ فەرەنگ و ئایین و زمان و نەتەوەکاندا بژین.
گرنگ نییە (سمێڵ) چ مانایەکی ئایینی و فەرهەنگی هەبێ، وەلێ رەمزی کەرامەتی شەخسی ئەم خەڵکەیە، هەر وەکو رەمزەکانی تایفەی (سیخ) لە هیندستان، یا کڵاوی یەهوودی (جوو)، یا قوترە و عەگالی عەرەبی، یا شێوەی تراشینی ریش و سمێڵی هەندێ مەزهەب، جا چاوەڕوانی دڵفراوانی و گیانی لێبوردەیی و رۆحی فەرهەنگی خەڵک و دەوڵەتی ئێرانین.
لەگەڵ رێز و سوپاسماندا
8/6/2013

ئیمزاکان:
1ـ فەلەکەدین کاکەیی – نووسەر، ئەندامی پێشووی پەرلەمانی هەرێمی کوردستان/هەولێر.
2 ـ پرۆفیسۆر د. شوکریە رەسوول، نووسەر، مامۆستای زانکۆ و چالاکوانی بواری فەرهەنگی و کۆمەڵایەتی/ هەولێر.
3 ـ رەمەزان کۆساری، شاعیر، کەسایەتی کۆمەڵایەتی هاوارـ هەڵەبجە.
4ـ ئەیاد کاکەیی – سەرۆکی لقی هەولێری سەندیکای پارێزەرانی کوردستان – هەولێر.
5ـ رەزا واحید، رۆژنامەنووس – هەولێر.
6ـ هیمن محمودکاکەیى ، چالاکوانى مەدەنى ، هەولێر.

7 ـ الیاس جەوزی – فەرمانبەر – هەولێر.
8ـ حامد ڕسماعیل محمد، سەرۆکی شارەوانی/سفەیە
9ـ خاتوو خەیریە سابوور، خانمی ماڵەوە، هاوینەهەواری سەڵاحەدین.
10ـ زریان کاکەیی، مامۆستای زانکۆ – هەولێر.
11ـ سەید سەعید کاکەیی، فەرمانبەر – کەرکوک.
12ـ سەید عەلی سەید محەمەد، کەسایەتی کۆمەڵایەتی – خانەقین.
13ـ خاتوو ئاوات کاکەیی، مامۆستا – کەرکوک.
14ـ خاتوو حەمدیە رەشید، خانمی ماڵ – هەڵەبجە.
15ـ نوری جەمشید عەدە، کەسایەتی کاکەیی/ سفەیە.
16ـ بەیان رەحیم کەریم، فەرمانبەر، هەولێر.
17ـ فوئاد واحد عەباس، کاسب/ کەرکوک.
18ـ دلۆڤان ئازاد، قوتابی/ کەرکوک.
وێنەیەکی بۆ:
– پەرلەمانی هەرێمی کوردستان.
– دەوڵەتی جمهوری ئیسلامی –تاران.
– هەردوو کونسوڵی ئێران لە سلێمانی و هەولێر.
– رێکخراوی نەتەوە یەکگرتووەکان (UN)، لیژنەی کەمە ئایینییەکان لە نیۆیۆرک.
– حزبەکانی رۆژهەڵاتی کوردستان.
پارتە سیاسەکان
– پارتی کرێکارانی کوردستان.
– رۆژنامە و کەناڵەکانی هەرێم.
– رێکخراوەکانی کۆمەڵگەی مەدەنی.
– رێکخراوەکانی یارسان و کاکەیی

Likes(0)Dislikes(0)